خطة مجنونة لكن ليه لأ؟

خطة مجنونة لكن ليه لأ؟

ليه ما تتنقلش العاصمة السياسة في مصر من القاهرة للصعيد؟ و نحافظ علي القاهرة عاصمة اقتصادية فيها مراكز الشركات الكبيرة؟

نبقي ادينا أهمية للصعيد من ناحية و الشركات ممكن تتشجع و تفتح استثمارات و مصانع قرب الأقليم السياسي و تديله بعد اقتصادي كمان بالأنتاج

و في الشمال العاصمة الأقتصادية قريبة من أوروبا و أسيا و مراكز الأدارة و اتخاذ القرار تبقي أقوي بعد التفرغ للأقتصاد فقط بعيد عن السياسة؟

حب. أحلم. أجتهد. تفائل

اتعلمت في سنة 2013 دروس ما اتعلمتهاش في ال30 سنة اللي عيشتهم قبلها.

كنت عيل و مشاعري بتحركني زيي زي أي تلميذ في ابتدائي و ده ورطني في مواقف اتداست فيها لمجرد اني مشيت بقلبي مش بعقلي. مش متضايق من حد. كارما هي اللي ما بتسيبش حد و حقي (أو حق عليا) سايبه لها

كنت ضعيف سايب الظروف تتحكم فيا و ماحاولتش أغيرها. كل تصرفانتي كانت رد فعل و ده علمني ان اللي من غير هدف بيبقي وسيله لغيره يحقق بيه هدفه أو يستعمله كوبري أو سد خانة لحد ما يلاقي حاجة أنسب له

كنت باسعد غيري علي حساب أحلامي و ضحيت بطموحي مرتين في أكتر من  عشر سنين غيروا مجالي و غيروا مستقبلي كله. و في الاخر لا غيري رضي ولا أنا عيشت مبسوط.

أتعلمت ان ممكن غيري يبقي له عندي حقوق بس الحقوق دي بتنتهي لما ما تتقدرش و تعتبر واجب مني.

و أخيرا اتعلمت ان لو انت طالع جبل و معاك شريك في الرحله ما ينفعش تطلع بيه أ بيها و هو مش ناوي تعمل حاجة غير انها تتشعبط بيك و تبقي انت طالع شايل 2 بمجهود واحد عشان الشريك ده معتبر ان "حقه" انك انت اللي تشيل و هو يتفرج. وفر مجهودك عشان لو ما عملتش كده يا اما ح تتعب و تقعوا انتوا الاتنين سوا في نص السكة يا مش ح توصلوا اصلا. يا اما شريكك ح يسيبك في نص السكة و يشوف حد فايق أكتر منك يوصله للقمه لأنك مش أكتر من اداه في نظره.

خليك قوي. خليك ربان السفينه مش راكب لا حول له ولا قوه.
 خليك أناني. أيوه أقصدها. بس قصدي ان لما حد بيعتبر ان مساعدتك له أو شركتك له واجب عليك مش محبه أو مشاركة و يخيرك بين مصلحتك و مصلحته خليك أناني لأنه مش ح يقدر.
 حب نفسك لأن دي الوحيده اللي باقيه لك في الدنيا دي. في ناس ح تقابلك في مسارك. منهم اللي سكته ح تتفق معاك لوقت سواء طويل أو قصير بس في النهايه ده حسب ما السكة تتقابل أو لأ و امتي تنتهي. لو ما حبيتش نفسك مش ح تحب اللي معاك. مش ح تقدر اللي معاك لأنك مش قادر تحب.
أسعد نفسك. خلي نفسك أكتر شخص بتبقي سعيد أنك معاه. خلي وقتك الخاص فرصه تعرف أنت مين. ما ينفش تبقي بتقعد مع ناس كتير بالساعات عشان تفهمم و مش بتقعد علي الأقل ربع ساعة استرخاء تعرف انت مين.
احلم. الانسان من غير حلم ميت منتظر الدفن.
أجتهد و تفائل. خليك واثق انك بتعمل احسن ما عندك عشان تتفائل ان بكره احسن.

حب. أحلم. أجتهد. تفائل.