سفسطة نشطاء الكيبورد

نشطاء الكيبورد... هم نفسهم مش عارفين هم عايزين ايه ولا عندهم حلول ولا أي شئ و لو ما تهتش معاهم و وديت بلدك في داهية زي السنتين اللي فاتوا تبفي مش فاهم. طيب أنا مبسوط اني مش فاهم... بس مش غبي اني أودي بلدي في داهية تاني بفكر عقيم لا قدم ولا أخر سنتين اشي عصر ليمون و اشي انقياد ورا شعارات طلع الدقنجية مطلعينها ولا نشطاء مش بنسمع صوتهم غير لما يكون في مصلحة الاخوان ولا بقي اللي بيعارضوا من أجل المعارضة و خربوها بالظبط زي الاخوان و نظام مبارك. 

فاكرين ان الناس نزلت بسببكوا يوم 30؟ بتضحكوا علي نفسكم ولا علي مين؟ الناس نزلت عشان طهقت و لو كنتوا ليكوا رأي ليه لازمة ولا حتي بربع التأثير بتاع الاخوان كان الناس اختارتكوا لكن انتوا رأيكوا صفر. عايشين في عالم افتراضي اخره شاشة الانترنت.

لا الناس ح تنتخبكوا عشان بقولوا نحسن المفروض مين يبقي رئيس ولا مين يبقي رئيس وزراء ولا مين فيكوا ياخد حته من التورته ولا مين انتوا راضيين عنه و مين لأ. ما انتوش وكلاء ولا أوصياء علي حد.

عايزين تقنعوا الناس برأيكم يبقي تبصوا علي مصلحتهم مش علي تصفية مصالحكم مع جيش ولا اخوان ولا نظام سابق.ممكن شعبيتكم تزيد لو اتخليتوا عن دافع الانتقام و دافع الغرور اللي مالوش أي لازمة ولا دليل علي الأرض و بدلتوه بالخوف علي كيان الدولة ووحدتها مش فاكرينها فسحة ولا رحلة صيد تشيلوا سلاح و يالا ننزل نصطاد ارهابيين.

ارحموا البلد بقي منكم شوية و لو مش قادرين علي حلول بلاش سفسطة فاضية.